工聯會王國興不時化身「九龍王帝」喺立法會寫大字報反拉布，噚日又有新猷，大大隻字寫「嘥嘥嘥、拉布拉布嘥」（圖），搞乜？佢話係將網上熱爆嘅數學洗腦歌「Side-Angle-Side」二創變為「拉布—嘥—拉布—嘥嘥嘥」，但自言五音不全，故只讀出嚟就算喎。
唔使咁謙喎，有名你叫MC興，應該唱得又rap得啦。佢又批評拉布議員係「精神錯亂，邏輯矛盾，人格分裂」，一方面要政府向市民問責，但有普選特首嘅政改機會又否決，不過講開人格分裂，其實MC興又何嘗唔係呢，一方面反拉布，狂轟議員點人數，之不過噚日民建聯陳鑑林有樣學樣點人數，MC興又拍爛手掌讚做得好，搞到八方好亂囉。