滙豐銀行前主席艾爾敦（David Eldon），噚日以八達通非執行主席身份亮相，撐個人對個人（P2P）流動支付服務「O! ePay好易畀」啟動禮。好耐冇喺公開場合露面嘅敦哥，精神奕奕，回復以往神采同身形。
呢位曾被喻為良心大班嘅前獅子行高層，有段時間身體有小毛病，瘦咗唔少，佢噚日同華華講，身體好番晒嘞，比以前增咗磅！
佢仲好有幽默感，話說敦哥幫八達通站台致辭時，後台突響錯一下音響，佢立刻鬼馬笑說，「我冇準備唱歌喎（艾爾敦乃好聲之人兼曾灌錄歌劇）」，惹來一陣笑聲。
艾爾敦今年71歲，2005年「登六」，卸任滙豐主席，榮休後仍活躍，舊年獲八達通委任為非執行主席。
艾爾敦以香港為家，話大仔同細女都在港工作，佢一家果然「真．睇好」大中華市場！