周日NBA季後賽，騎士憑「三巨頭」勒邦占士（LeBron James）、K艾榮（Kyrie Irving）同路夫（Kevin Love）加埋轟入81分，主場以106:101擊退活塞，喺七場四勝制中領先1:0。
三巨頭轟81分破活塞
騎士今場贏得有驚無險，呢隊東岸一哥有「三巨頭」齊齊發威，占士「雙雙」22分11助攻，艾榮射入全場最高31分，路夫亦交出「雙雙」28分13籃板，助球隊以五分之差擊敗活塞；打破個人季後賽單場得分新高嘅路夫，仲話希望騎士之後每場都打得咁好。不過，今場表現出色嘅占士，喺第三節淨番8分26秒嗰陣傳波畀三分線外空晒嘅艾榮，然後即刻舉晒手跑番後場慶祝，點知艾榮竟然射失波嘅鏡頭，就肯定會喺下集Shaqtin' a Fool出現喇。唔知占士近排係咪睇得勇士嘅比賽多，當個個隊友都係三分王史堤芬居里（Stephen Curry）呢？