財爺曾俊華呢排頻頻出招冧市民，到底有冇目的？大家都唔使諗太多，到咗特首選舉之時，自然會有分曉！
好似前日咁吖，佢就喺facebook貼咗一張高中相，冇咗撇招牌鬍鬚，戴住副黑框眼鏡，都幾官仔骨骨。點知，有網民驚覺那些年嘅無鬚嘅財爺，激似一位立法會議員，冇錯，就係公民黨楊岳橋，連埋呢次，「岳少」已經前前後後同5個人「撞樣」，堪稱新一代撞樣王喎。
查實財爺發表網誌當日，網民已經話呀，好似岳少喎。但，無圖無真相，結果岳少噚日喺fb貼出加拿大讀書嘅舊相，嘩，雖則嗰時岳少戴住金絲眼鏡，但個樣兼神情甚至個甫士，真係同財爺激似喎！
「四眼仔都咁樣㗎啦」
八方問過岳少，佢話同事見到有網民話佢同財爺似樣，即刻幫佢搵舊照出嚟對照下，兩張相擺埋一齊，證明網民真係好眼利兼犀利。
但岳少笑笑口同八方話，其實讀書時代嘅四眼仔，個個都係咁嘅樣㗎啦，似乎唔覺同無鬚財爺似樣好特別咁噃！
而查實呢，佢之前已經被外界話過似歌手小肥、組合農夫嘅C君（新東補選時，網民咪將佢同本土民主前線梁天琦，形容係C君同陸永囉），以及同人民力量嘅「快必」譚得志同埋蘇浩係失散兄弟，堪稱政界撞樣王，唔知佢又自覺，同邊個最似樣呢？
李八方
mailto:[email protected]