【中環】商台DJ甄子康（少爺占）大前年自爆和圈外女友Tina（洗燕珍）瞞婚7年，前年還成為人父。不用再左瞞右瞞自己是已婚男，少爺占近兩年間中都會被傳媒影到一家三口出動放閃。
前日下午4時多，少爺占和太太還有兩歲囝囝，現身中環ifc行街享天倫樂，少爺占和太太還一人一邊拖實囝囝行，一家三口沿途有講有笑，場面溫馨。記者見少爺占陪老婆在鞋舖試鞋時，充當湊仔公的他，就負責幫老婆揹手袋和照顧囝囝，見他在鞋舖左騰右騰周圍望，看來是想搵張凳坐一下鬆筋骨，不過鞋舖座位有限，加上眼見有不少自由行佔用，少爺占惟有拖實囝囝出舖頭行一轉打發時間。
「後悔冇帶BB車」
事後記者致電少爺占，他透露今日是囝囝兩歲生日，所以前日趁住假期，和老婆陪囝囝到ifc四季酒店食晏慶祝，他說：「嗰日我好後悔冇帶BB車，因為冇得鎖住囝囝，搞到我一手抱住20幾磅嘅佢，另一隻手就要拎住老婆20磅重嘅袋，入面有奶粉、奶樽、尿片，你想像唔到有幾重，以我100磅嘅身軀要拎住50磅重量嘅嘢，嗰種狼狽法𠵱家諗起都驚！」
囝囝兩歲生日，少爺占透露送了一份好有意義的生日禮物給囝囝，他說：「我送咗對鞋仔畀佢，因為我買一對，舖頭就會送一對鞋畀第三世界國家嘅小朋友。」
採訪：王梓嫚
攝影：朱志聰、黃曉程