嘩！呢三位着西裝嘅管理層背晒台搞乜呢？咁企法好易令人誤會㗎喎。
查實噚日係台灣富邦人壽進軍香港，新成立香港富邦人壽嘅開幕禮。三位來自台灣嘅管理層：銀保通路處資深副總經理陳世岳、董事長鄭本源、香港富邦人壽總經理周資為（Jerry）諗住打鼓，打響名聲，可惜經驗不足，背晒台去打鼓咪變成咁囉，好在司儀立即提醒佢哋，先至一齊轉番身畀大家影相。
Jerry積極想融入香港文化，舊年8月特登學講廣東話，噚日用廣東話致辭時，雖然有鄉音，但呢份心思已經好抵讚。Jerry話，香港近年有唔少本土聲音，同台灣人一樣，都係愛家鄉啫，佢都希望喺香港開會時可以用廣東話。Jerry估計，一個月後可以正式推出保險產品，並以打入本港首十大壽險公司為目標。