王菲同謝霆鋒舊情復熾，兩人打得火熱頻傳婚訊，前夫李亞鵬嘅感情生活似乎冇咁精采，不過，日前有內地傳媒影到李亞鵬同家人開餐，現場除咗有媽咪同囡囡李嫣之外，同枱仲有一位神秘女子，佢坐喺李亞鵬隔籬，明顯已經入晒屋，獲得李媽媽同李嫣認可，似足一家人。
好識冧李嫣
呢餐私人飯局嘅座位編排，李亞鵬嘅右邊係母親大人，但左邊並唔係寶貝女李嫣，而係呢位神秘女子。該女年約30多歲，打扮樸素，紮起頭髮，着一件普通衞衣，成餐飯同李亞鵬兩父女又食又傾，感情好融洽；其間神秘女仲同李嫣玩自拍，兩個人都用絲巾披頭，擺同一表情甫士影相，好識冧細路女。
原來呢位神秘女子喺去年夏天，已經被影到同李亞鵬一家人食飯，似乎佢同李亞鵬情非泛泛，網友仲估唔知佢會唔會成為李嫣嘅後母呢？不過，有心水清網友爆呢位神秘女其實係嫣然天使基金嘅員工，亦係音樂人鄧謳歌嘅老婆，原來當日飯局鄧都在場，事後鄧喺微博貼李亞鵬父女相，仲留言話：「怎麽他鍛煉後效果這麽好啊？我天天游泳沒效果還越來越胖？」
撰文：馮仁昭