中學生不應談戀愛？真係好out，估唔到傳媒人張寶華（Sharon）嘅中學時代，竟然緊守呢條「底線」：「係咪覺得我活於恐龍時代？」
小時候嘅Sharon，眼仔睩睩好多活動，書法、畫畫、游水同芭蕾舞乜都啱。咁活潑好動，無理由只愛咪書、不愛談情，何解會變咗當代恐龍？就讀筲箕灣聖馬可中學嘅Sharon話冇乜特別原因，「只係由細到大都覺得，中學生要專心讀書咋」。
隔籬校男生等放學
結果佢全心一意咪書，每日溫兼每周重溫，所以讀書成績唔錯，之後入咗中大其後仲到牛津進修。但唔拍拖不代表冇人追：「有㗎，嗰時唔興送花，都有啲男仔不時送勞作畀我」，亦有同區慈幼英文學校嘅男生喺門口等佢放學。佢坦承試過同男同學結伴睇戲，但冇發展為情侶，成世女（年齡係女人嘅秘密，所以佢無可奉告）拍拖次數唔多，「可能我唔係好易鍾意一個人」。至於𠵱家仲係黃金盛女，佢笑住話：「都有dating㗎……」