80年代可以話係香港最風光嘅年代，唔單止係樂壇盛世、影壇盛世，連「士碌架」（即係桌球）都係盛世；而一手帶起桌球呢段輝煌日子嘅英格蘭名宿戴維斯（Steve Davis），喺日前就宣佈「掛Q」。
有一定年紀嘅讀者，應該記得喺80年代，戴維斯曾經幫某XO品牌拍電視廣告；喺廣告入面，佢嘅金句係：「但係六屆世界冠軍始終係我。」（有廣東話配音版㗎！）的確，當年桌球喺香港風靡一時，而當時嘅球手又往往形象鮮明，配以貼切外號，好似「眼鏡蛇」泰萊、「白旋風」韋德，仲有香港嘅「亞洲之虎」郭軍城等，令人相當入腦，亦份外有親切感，所以就算當年香港啲波樓通常煙霧瀰漫，仲有啲因為地方淺窄要整短Q棍，依然人頭湧湧，連提供嘅餐蛋麵都好似特別好食。
六屆世界冠軍念亡父
不過，再鋒利嘅刀都有生鏽嘅一日，戴維斯雖然係六屆世錦賽冠軍，又曾經係世界一哥，但始終都58歲喇，加上佢嘅爸爸兼桌球啟蒙老師比爾喺兩星期前仙遊，所以當戴維斯喺本月10日嘅世錦賽外圍賽首圈以4:10輸畀奧拜恩後，就喺日前宣佈退休。喺1978年成為職業球手嘅戴維斯話：「其實我早應該退休，我參加外圍賽係為咗紀念我爸爸。我好幸運可以將嗜好變成職業，職業生涯亦多姿多采，我無怨無悔；我相信桌球運動會繼續發展同有進步，但我就自覺已經係球壇嘅老爺爺。」一般相信，生涯搵到超過560萬鎊（約6,190萬港元）嘅戴維斯，退休後會繼續做桌球評述員。
自爆往事好憎亨特利
喺38年職業生涯中，戴維斯話印象最深刻一定係1985年世錦賽決賽爆冷輸畀泰萊，當時鬥到最後一個黑柴先分勝負，佢話：「對泰萊打失嗰球黑柴，可以話係我職業生涯最好同最差嘅時刻，因為當時人人都以為我會贏，而大家都為戰果感到好興奮。」佢亦不諱言曾經好討厭後起之秀亨特利：「喺1990年英國公開賽，我輸咗畀亨特利；我覺得好似本來係屬於我嘅糖果，突然畀晒佢。亨特利好強，打法好進取，係我未見過嘅，我一度好討厭佢，甚至想無視佢！」