每年滙控（005）舉行股東會，中環總行樓下打晒蛇餅，今年睇落出席人數特別多，開會前大半小時，已有幾百人等入場，係咪股價跌到啪啪聲，股東打算拎番盒曲奇禮盒消氣呢？
聽聞今年曲奇禮盒準備得特別充足，唔似往年一早派晒，轉派餅卡。可能因為太多人拎曲奇，搞到股東會遲咗5分鐘開始，連主席范智廉（Douglas Flint）都話唔好意思，因為今年人數出奇地多，話遲啲會考慮搵個大啲嘅場，唔知會係邊度呢？
講番個股東會，除咗范智廉之外，行政總裁歐智華、亞太區行政總裁王冬勝、大中華區行政總裁黃碧娟都有出席，不過相信佢哋唔會坐得好happy，事關不停被股東數落，股東會變成申訴大會。