細劉寶貝女、今年3月先正式坐正做利福國際（1212）執董嘅劉今蟾，噚日首次正式見股東同傳媒。佢噚日同細佬一齊到場，雖然冇做利福地產（2183）董事，但都坐足兩場股東會。
劉今蟾今年28歲，真人皮膚好好，打扮端莊簡約，佢做開品牌銷售推廣，被問到入利福有乜搞作時，細細聲答：「我仲學緊嘢。」之後就冇再答問題，好似比較怕醜。
細劉當然錫住一對仔女，股東會完場，佢為掩護愛女離開，仲主動獻身應付傳媒提問。細劉強調，一對仔女加入董事局唔等於正式交棒，𠵱家講呢啲係言之過早，而且公司係靠teamwork努力咁話。
其實佢一對仔女做得執董，應該開始習慣與投資者、傳媒打交道，希望佢哋下次表現輕鬆啲。