昔年銀行客戶（美國上市公司）的CFO大衛M自多倫多往大阪東京賞花後回港小住，例牌搵左丁山飲茶，以前同M夫婦吃午飯去過鏞記、陸羽、山光道馬會、中國廳、上海總會等等，呢次特登約佢去朗豪坊康得思酒店明閣，大衛M食完叉燒、乳鴿、上湯浸莧菜等等，連連叫好，讚聲不絕，話前年到中山石岐吃燒乳鴿，已認為係無以尚之，點諗到今次在旺角竟然吃到更好味道嘅乳鴿！（不過後來睇到賬單顯示，明閣燒乳鴿賣168元一隻，幾貴吓，聽講中山石岐燒乳鴿售價只係三十幾元人民幣一隻，計性價比就贏晒，如果唔計車船旅費成本及時間成本嘅話。）
飯後拜拜，左丁山特登在上海街砵蘭街、彌敦道行一個轉，緬懷吓中小學年代長大，留下不少腳毛嘅地方。景物當然已完全不同，只係中學會考時與同學挑燈夜讀，幾乎不眠不休嘅舊樓仍然未拆，依舊係四層樓建築，只是樓下地舖由「單眼佬涼茶」變咗係周大福，所有其他樓宇都重建晒，獨係呢四層單幢建築物保留，着實有啲奇怪。想當年，幾位死黨同學驚住會考肥佬，在這裏三樓借地方「集宿」，飲黑咖啡加檸檬加鹽，可24小時不睡，壓力不可謂不大，但無辦法啦，人地讀英皇男拔好似考會考篤定及格，之後直升港大咁，我地私校學生考會考往往「瓜多過菜」，冇法子唔將勤補拙，死背死讀，卒之僥倖過關，升上大學，以後改變人生，同板間房冷巷床位講拜拜。
後來讀經濟學方知有一個factor endowment呢個概念，中文意思係「天賦資源」、「天賦條件」、「天賦才能」，昨日講及田二少議員，佢嘅factor endowment就好過我地好多，左丁山班上一位同學，最有錢嗰位，後來就在康奈爾大學高田二少兩三班。田二少由男拔去康奈爾去哈佛商學院，全不愁學費生活費，左丁山等人就由私校苦拼入中大呢間窮人無產階級大學（港大學生有錢得多），畢業後仍未坐過飛機，「天賦資源」與田少冇得比，但當年可以揸支筆、揸本拍字簿，日日做功課將勤補拙，田二少階層去學鋼琴小提琴法文之時，我地就繼續做功課，靠考試上位。最近聽到田二少及一些人士倡議小學零功課，左丁山覺得好荒謬，窮學校出窮學生，天賦條件遠不如男女拔、聖保羅，唔靠做功課苦讀，點同富家子弟及老牌名校競爭呀？零功課對清貧學生嚟講，簡直係糖衣毒藥，先甜後苦，沒有甚麼factor endowment嘅學校與家庭，千萬不可中計。