根據差估署數字，喺港島區租一個430平方呎以下單位，每月呎租要40.4元。原來15年前，同類型單位每月呎租只要17.4元，即15年來呎租升逾兩倍。
當然，世上有樣嘢叫通脹，近15年間本港租金上升之餘，期內人工固然亦有得升，只可惜遠遠跑輸租金。統計處截至2014年嘅最新數據顯示，2001年至2014年間，港人月入中位數升幅係36%，但最近15年，無論港島、九龍定新界區的單位，不論面積大小，整體呎租升幅一律超過上述港人入息中位數的升幅。
呎租升得最勁嘅係港島區40平方米（即約430平方呎）以下單位，呎租期內升咗1.33倍，其次係新界區同九龍區嘅430平方呎以下單位，期內呎租分別升咗1.27倍同1.26倍。15年間港人人工升三成幾，但呎租就升超過一倍，令到唔少人要住劏房或工廈。
新界區160平方米（即大約1722平方呎）以上單位，15年間呎租升37.6%。只不過呢類大單位月租係四萬蚊起跳，相比港人月入中位數1.5萬多出兩倍有多，所以呎租幾平都唔關大部份港人事。
單位面積越細，呎租唔見得會越貴，但細單位呎租升幅就肯定跑贏大單位。2001至2015年間，面積69.9平方米（約752呎）或以下嘅單位，不論位處港九定新界，整體呎租都升咗超過一倍。窮人先租唔起大單位，但細單位升幅偏偏又多過大單位，越窮越見鬼。
El.
本欄逢周二、五刊出