有冇諗過電動車以後可以邊行邊吸塵？Dyson或者可以幫你實現呢個夢想。據英國《衛報》報道，Dyson𠵱家喺英國威爾特郡嘅總部研發緊電動車。
點解《衛報》知道？因為英國政府一份名為「國家基建運輸計劃書」嘅文件疑似唔小心曝光。呢份文件披露，英國政府向Dyson電動車項目投資1.74億英鎊，令Dyson可以請500名員工去研發電動車。
Dyson開發電動車早已有迹可尋。Dyson舊年10月用9,000萬美元（約7億港元）買入美國電池技術公司Sakti3。據市場分析，Dyson收購Sakti3，係因為睇中佢開發緊嘅固態電池技術，而固態電池技術被視為下一代電動車必備技術。
Dyson出名嘅產品有無線吸塵機同無扇葉風扇，以後啲電動車係咪可以邊行邊吸塵，清潔路面？