嚟緊個星期日就係第35屆香港電影金像獎頒獎典禮，今年焦點之一係四大天王有三位都入圍爭影帝，包括劉德華（失孤）、 張學友（暗色天堂）同埋郭富城（踏血尋梅）。
記者：黃芷蔚 攝影：馮峰
今年城城呼聲都幾高，一來因為《踏血尋梅》有13個提名，城城早前憑呢套電影已經喺電影導演會、柏林華語電影節等頒獎禮攞咗影帝，二來因為佢入圍過四次金像影帝都落空，唔少人都覺得係時候頒畀佢。但講到錯失金像影帝，學友經驗比城城更豐富，早喺1991年已經憑住《喋血街頭》入圍，其後仲有《新邊緣人》、《男人四十》、《金雞2》同埋《月滿軒尼詩》......都失落咗，今次《暗色天堂》入面做牧師都好有發揮。唔知金馬影帝城城VS印度影帝學友，邊個會跑出呢？不如聽吓電影界朋友點講？
張家輝：我自己偏私學友
黃修平：可唔可以雙冠軍？
黃秋生：（城城）做錯戲，佢做咗一個榕樹頭講故佬
春夏：希望郭富城先生可以拿獎，覺得他付出太多，希望他可以得到一些肯定
翁子光：我覺得郭富城演技不單止係一兩部電影，佢嘅演技一直進步緊，所以今年金像獎係咪應畀佢一啲鼓勵
嚟緊戲流教主仲會分析影后同埋最佳電影大熱，留意聽日同後日蘋果即時新聞啦！