做人做事一樣，如果泊到大碼頭，總是事半功倍，正如你係李超人身邊紅人，總有點優勢吧。炒股亦然，殼股只要沾上名牌，炒起上嚟肯定更加得心應手。近期最佳例子莫過於耀科（143），做電訊產品貿易，比大台奀星更加寂寂無名，最後竟獲中信旗下中信國安睇上，人氣幾何級數上升。入股約一季時間，股價已有倍倍聲升幅。
持有《明報周刊》及《100毛》嘅萬華（426），本身已有江湖地位，最近驚喜打孖上。公司透露，大股東世界華文媒體（685）獲洽購萬華控股權，洽購者不是別人，而是具國企質地嘅青島西海岸控股。後者更誠意十足，交出600萬銀作為誠意金，換取一個半月獨家磋商期。
萬華已預警截至3月底止全年業績，有機會轉盈為虧，除因聯營錄得減值準備外，亦受累內地經濟放緩，廣告商閂水喉，令廣告收益下跌。業績轉差，賣盤變得理所當然，如今獲國企看上，身價隨時大漲，最新市值只得6億，在下月15日獨家磋商期截止前，依然有好多憧憬空間！
唐牛
https://www.facebook.com/tongcow88
本欄逢周二、四刊出