上星期日晚收到地產F短訊：「左丁山，今晚只得我同F老太晚飯，翻叮浙江軒墨魚竹筍炆豬肉，好味！」嘩，地產F荷包好爽，最鍾意食靚嘢，F老太（其實係F太，一位識得凍齡凍顏嘅靚太）煑家藏鮑魚都唔知幾好味，點知星期日大概係菲傭放假，子女新抱女婿各有節目，佢地好好享受二人世界，食吓打包隔夜餸就算。
前星期四，左丁山做東，徇眾要求到浙江軒食午飯，本有12人，會長C臨時有事唔嚟，大家食慾不復當年勇，啲嘢食唔晒，地產F最着緊唔好浪費，即刻講定要「春筍目魚紅燒玉」（即地產F所言之墨魚春筍炆豬肉）打包，呢味餸十分濃味，紅燒肉大家又唔敢食咁多，於是剩番大半盤俾地產F，估唔到兩日後翻叮仍然味道濃郁，唔怪得地產F當日盛讚呢個菜可能係浙江軒做得全港第一，另外一味「奉化拆骨魚頭」亦正斗，賓架W連盡兩碗，外匯G就要攞走浙江軒招牌菜「火朣雞燉津膽雲吞湯」嘅火腿。呢餐大家食得盡興，下一次由賓架W做東，話要轉口味，到「古琴」食潮州菜，可惜到時左丁山另有飯局約會在陸羽，失陪了。
浙江軒與上海總會基本上同出一源，理事同是一批江浙（寧波）同鄉，江浙人出手豪爽，由牽頭人李和聲李德麟父子講一聲，好快就集資一億買咗駱克道僑阜大廈三層樓開辦浙江軒，以較商業化手法經營，李德麟范思浩等理事落力監察營運，當係自己盤生意咁管，所以好快就聲譽鵲起客似雲來咯。
隔兩日，行過置地廣場去皇九，天橋旁以前Pringle店已變成一間餐廳叫做Mak Mak，賣泰國菜。嘩，咁貴租金，賣泰國菜？打得乎？於是下午一時過後，走入去試吓，自己唔食辣，幾經搜尋，至搵到菠蘿炒飯、泰式煎菜，肉丸豆腐湯，又幾好味噃，唔怪得侍應話訂位要分12時與1時15分兩個時段，呢間泰國菜價錢唔太貴，可惜坐滿人就幾聲音嘈吵，客人以英文客為多。問泰國A，Mak Mak係乜意思，佢話應該係發音如Mark Mark，即係夠多夠勁之意。左丁山周圍望吓，人客又以女性佔咗七八成，中環點都係OL世界，男仔在高級餐廳常是少數。又隔三日，在紅磡返工嘅廣告人A話要吃飯有嘢傾，可否在九龍？想起曾智華推介，就叫佢去朗豪坊明閣，曾智華講一定要食乳鴿與叉燒，咦，果然係好掂，掂到冇得彈，點心與上湯浸菜心亦係一流水準，到旺角吃飯，明閣係首選，應無異議。