趁住業績期，2017年特首「跑馬仔」暗中開賽，記者都會追問班大孖沙點睇特首梁振英、同埋支唔支持佢連任。嘉華國際（173）主席呂志和噚日答問題時就相當盞鬼，形容CY「都係一個人類」，叫大家要先欣賞佢，唔好成日捉佢痛腳喎。
呂志和形容CY「真係好落力」，有人讚好，亦有人批評，但「究竟都係一個人類嚟嘅」，所以大家要先學識欣賞佢，而唔係成日捉佢痛腳。呂志和之後講，痛腳嚟講人人都有，仲自嘲「我𠵱家行出去，都可以捉到我痛腳㗎」。
記者打蛇隨棍上問，既然咁欣賞CY，會唔會支持佢連任先？向來聽嘢唔係太清楚嘅呂志和，即刻笑笑口答「咁你唔好斷章取義喎」，之後再補飛讚「好平實，市民應該欣賞佢」。
怕過早表態撐連任「易中箭」
睇返呢兩日、多位富豪對特首嘅睇法，以李嘉誠嘅「try hard」、「盡咗力」最惹人遐想；「四叔」李兆基就覺得梁振英好勤力，「做得好唔好都有人鬧」。唯一共通點都係無正式表態撐唔撐CY再做多屆，呂志和就講得比較白，擔心過早表態「好易會中箭」喎。
同李嘉誠、李兆基份屬老友嘅呂志和又講，超人嘅「經濟廿年最差」論，定係四叔「樓價跌三成」論，都係由心講出嚟，大家最好用心分析下。不過，佢自己就覺得香港經濟唔係咁差，「短暫低潮好快會過，唔需要驚」。
李華華
mailto:[email protected]