結好控股（064）分拆旗下證券業務結好金融（1469）上市，董事會主席洪漢文撞手神攞到心水冧巴！
噚日記者會上，未講業務、招股細節，洪漢文急不及待要分享個靚冧巴來歷。一如大部份上市公司，洪漢文有諗過參加「股份代號慈善抽籤安排計劃」，捐錢畀公益金，區區100萬蚊就可以任揀心水上市編號。「但我又諗唔到用咩冧巴好，咁就算啦，抽籤啦」，點知「發夢都估唔到，一抽，就抽到1469」。
呢四個數字對經紀行意義特別大，因為攞齊證監會1號（證券交易）、4號（就證券提供意見）、6號（就機構融資提供意見，即新股保薦人）、9號（提供資產管理）牌照，先算係一間業務完整嘅經紀行。唔怪得洪漢文咁開心，分文不出都可以撞手神咁好運啦！