「林瘋」再現！黃蜂喺同日另一場常規賽，憑後備上陣嘅林書豪（Jeremy Lin、右）攻入21分，以105:100擊敗網隊；佢亦繼周一反勝馬刺後，再次成為球隊嘅贏波功臣。
本月初A史杜達米亞（Amar'e Stoudemire）爆料，話林書豪喺紐約人打出名堂嗰陣，曾經有球員因為咁而唔高興，最終搞到林書豪冇得留隊。而近日表現回勇、為黃蜂贏波嘅林書豪表示，自己唔會理呢啲謠言：「我𠵱家只想為球隊贏波，爭取打入季後賽。」
至於黃蜂另一贏波功臣、攻入23分嘅巴登（Nicolas Batum），都忍唔住大讚林書豪：「佢對球隊真係好重要！尤其喺下半場，佢嘅表現真係好出色。」
目前東岸嘅戰況混亂，因為暫列第六嘅黃蜂，戰績同第四嘅鷹隊，以及第五嘅塞爾特人同為41勝30負，所以餘下每場常規賽嘅勝負，都有可能影響佢哋嘅名次。