「關公」最近又唔得閒喇！話說早前有報章因手民之誤，將屬於Canon嘅新相機型號EOS 80D，錯誤寫成「Nikon EOS 80D」。而報道刊出嘅查詢電話，雖然係「真．Canon」嘅號碼，但就誤標示為Nikon。Nikon前日率先喺facebook出post，除咗澄清正確電話號碼，仲登咗張加上問號、不同型號嘅相機圖，擺明車馬抽水。事件中嘅另一「受害者」Canon，亦喺兩小時後出Post，仲加句「有相機自稱為EOS 80D，分明當我流唧！」，明寸對手Nikon。
正當一班食盡花生嘅網民，以為事件就此告一段落，結果Nikon埋門再「終極一抽」，上載咗一張同今次搞錯嘅型號極相似、剛面世10年的Nikon D80嘅「玉照」，認真「水塘都抽乾了」。
仲以為今次「關公」現身，會搞到一鑊粥，誰不知成功「化蝦碌為機會」，Nikon嘅品牌同Canon部新機，宣傳費可以慳一截，變相由「受害者」變贏家喇！