周二NBA常規賽，被網民惡搞為忍者龜嘅韋斯卜克（Russell Westbrook）以「大三元」21分15助攻13籃板，助雷霆以111:107擊敗火箭；佢亦追上米高佐敦（Michael Jordan）喺1988/89球季所寫下嘅單季15次大三元成績。
發威15次 雷霆都贏晒
今季有15次交出大三元嘅韋斯卜克，追平咗MJ喺88/89球季嘅三雙次數，更有機會喺餘下11場常規賽中，挑戰魔術手莊遜單季17次嘅紀錄；為此佢亦表現得相當興奮：「可以同名人堂級別嘅球星相提並論，我當然高興；不過我𠵱家只想幫雷霆贏波，贏總冠軍！」呢位27歲嘅控衞雖然連續三場攞到三雙，但佢就話自己冇刻意刷數據：「我喺球賽中，會作出我認為啱嘅決定；無論得分、搶籃板、抑或交出助攻，我都會做出有利球隊嘅決定。」佢喺三月交出六次大三元，亦追平咗「小鳥」布特（Larry Bird）喺1985/86球季嘅單月大三元次數。
教練比利當路雲（Billy Donovan）亦對愛徒有讚冇彈：「大三元無疑反映出韋斯卜克嘅能力，因為一個球員要有充足嘅體能同爭勝心，先可以有咁好嘅表現。」雷霆今季喺韋斯卜克交出大三元嘅情況下，攞到15戰全勝嘅佳績；當家球星杜蘭特（Kevin Durant）亦對呢位拍檔讚不絕口：「大家都知道韋斯卜克得分同助攻能力出眾，但佢搶到咁多籃板嘅時候，會令球隊變得更勁。」
今場射入23分嘅杜蘭特，都冇俾韋斯卜克搶盡風頭；因為佢追平自己喺2013/14球季中，連續56場至少攞到20分嘅紀錄；不過「大少」就覺得冇乜特別：「得分係我嘅職責，球隊出糧畀我，我每場比賽都要交出好表現。」
曾經喺2005/06球季，試過連續63場得分超過20分嘅湖人球星拜恩（Kobe Bryant），喺同日另一場復出，呢位37歲老將喺職業生涯最後一次對灰熊嘅常規賽，正選上陣並攻入20分，幫球隊以107:100贏波。