全國人大常委范徐麗泰囝囝范駿華（圖）同邱德根孻仔邱達根，喺2013年搞咗間喜洋洋電影工作坊製作電影，喜洋洋前年仲同藝人曾志偉嘅影市堂簽約㖭，合作拍咗部《吉星高照2015》。聽個名，係咪……冇乜印象呢？套戲舊年3月上映，由曾志偉擔綱演出，仲有王祖藍㖭。
唔記得唔緊要，𠵱家有機會提吓大家，因為喜洋洋日前入稟，為咗呢套戲要告曾志偉，話係受曾誤導下先至簽合約，又話曾同佢拍檔區詠芝串謀違約，要求曾等人賠償450萬元，仲有聲明喜洋洋佔電影製作利潤及權益嘅37.5%。
其實套戲嗰時啲影評都幾負面，美其名話向周星馳致敬，但有影評就話只係將星爺演過嘅電影場面炒埋一碟，演員又求其。唔通范駿華同邱達根，都唔滿意套戲表現差勁？