跑馬地馬場上空這晚橫風橫雨，賽果越開越冷，第四場三班1000米，女將蔣嘉琦策騎12檔告廐馬「滿貫豐采」，起步火速切入，之後沿欄領放，並力壓臨門於其外側如飛冚上的「氣勢如虹」勝出，七歲馬爆23倍冷門取得今季首捷，組合獨贏開A3並派44.5元。
反觀「氣勢如虹」黎海榮喪打左手鞭，雖越衝越行，但不停內閃，壓線一步輸鼻位，落飛綠燈馬飲恨做二奶，黎海榮個樣冇晒心機，似擔心受罰。事關「氣勢如虹」持續壓向內側，令第三名「聰明申報」及跑第四的「花紅」勒避失位，「聰明申報」勒避尤其明顯，黎海榮騎法有啲魯莽。而四重彩派一萬蚊多啲。
講番「滿貫豐采」，蔣嘉琦及告達理合作取勝，前者上周三晚首勝谷草贏高廄「誠信寶駒」捧盃，一周後再於同一馬場建功，表現出色，而告達理繼本月2日「感恩」後，再次爆冷贏谷戰，馬房再贏多四場，就達到續牌指標。可惜「滿貫豐采」過終點後疑似跛腳，蔣嘉琦需在跑道落馬，並將座騎交畀工作人員，最終「滿貫豐采」自行步上運馬車，返馬醫院接受治療，該駒不能到凱旋門與馬主影頭馬相。