嚟緊幾日復活節假期，相信部份港人都會去啲短途旅行充電一番，日本、韓國同台灣等應該係首選，商務及經濟發展局長蘇錦樑搶閘出發咯，但佢係為公務而唔係休假而到首爾，主要參觀多個創意產業機構，了解韓國喺培育創意人才同推動創意產業方面嘅發展。
蘇錦樑參觀咗東大門設計廣場，呢個設計廣場係韓國設計產業最新同最具標誌性嘅地標，其後就去咗一間韓國流行音樂舞蹈學校參觀，除咗聽取該校為年輕舞者舉辦嘅各項課程同工作坊簡介，現場仲有學員過幾招畀佢，佢都跟住邊學邊跳，唔通佢想挑戰G-Dragon？
噚晚返港前，佢仲參觀咗一間由亞洲著名娛樂企業CJ E&M成立嘅流行音樂及演藝學院——M學院，同學院高級管理層會面，探討港、韓喺培育創意人才嘅合作機會。