效力曼城嘅法國中場拿斯尼，上周六揸佢部價值33萬鎊（約363萬港元）嘅炭黑色林寶堅尼Aventador Pirelli Edition出嚟威威，點知轉個頭喺周日就俾英國警方扣押咗（圖），因為架車未喺英國登記；查實拿斯尼唔係第一次揸車出事，佢喺2013年冇交超速罰款搞到停牌六個月。另外，佢位曼城隊友史達寧嘅鼠蹊傷勢比想像中嚴重，可能要唞六星期，而唔係最初估計嘅兩星期；不過，呢位21歲英格蘭國腳翼鋒，應該趕得切踢今夏嘅歐國盃決賽周。