年報間間上市公司都會有，但用心寫「致股東函」嘅管理層卻少之又少。恒隆地產（101）董事長陳啟宗，今年用咗成1.7萬字撰寫致股東函，破晒歷來紀錄。據聞陳啟宗每年都會通幾晚頂「作文」，一年寫兩次，簡直係心血之作。
用「上癮」形容陳啟宗寫作真係一啲都唔過份，今年恒隆地產年報內，單單「董事長致股東函」已經用咗17頁，接近1.2萬字！已經很誇張嗎？少年你太年輕了，陳啟宗喺恒隆集團（010）嘅年報，再寫咗一篇5,000幾字嘅長文，照佢解釋，一篇討論整體經濟和集團策略，另一篇就分析中國地產業。
陳啟宗去年篇「致股東函」唱淡中國經濟，喺內地被瘋傳，佢今年重提舊事，話唔清楚瘋傳嘅原因，但「至少都是實話實說」。文中又指，看淡中國經濟前景嘅想法唔會變，「管理層正就最壞的情況作出準備」，唔知會唔會再次震驚13億中國人呢？