特首選戰殺到埋身，被視為黑馬嘅財政司司長曾俊華，無論否認咗幾多次唔選，都冇人信喎，繼續成為勢爭連任嘅特首梁振英最大勁敵！但鬍鬚曾冇有怕，唔怕梁粉會因此柴佢台，噚日殺入梁粉陣地、出席由特首梁振英創立嘅香港專業聯盟舉辦嘅午餐會，其間仲同梁粉多番過招，兼且暗示梁粉信唔過。咦咦咦，似乎若然要去選，梁粉嘅票佢未必想要！
「深圳成功係因為近香港」
曾任梁振英競選辦副主任、聯盟主席劉炳章，噚日喺鬍鬚曾一到場，即刻熱情上前握手，仲話今日有好多年輕人出席午餐會，鬍鬚曾聞言笑笑口話喎：「Don't trust anyone over 30.」「係咩？點解？」劉炳章似乎有啲詫異，覺得意有所指咁？鬍鬚曾如常輕鬆回應：「嗰時我哋啲口頭禪係咁！」聽完呢句，劉炳章仲可以點？咪只笑笑說：「咁即係唔信任我哋箒。」繼而「哈哈哈」打圓場。
查實「Don't trust anyone over 30」係Jack Weinberg嘅金句，佢喺1964年喺美國加州大學柏克萊分校發起學運；於美國讀番書嘅鬍鬚曾難免對此金句記憶猶新；至於點解要拋呢句金句呢？講吓笑定另有意思？八方都唔知，但好相信會令部份梁粉煞有介事。
鬍鬚曾上台發言時，劉炳章就隔空同鬍鬚曾過招，批評香港比起深圳、喺發展科技上較為遜色，又不滿政府只識發展金融、旅遊、商貿同航運等。
鬍鬚曾回應時都幾寸，直指深圳比好多內地省市成功，「係因為佢哋近香港」，又話好多深圳公司請人時，工人都住喺香港、會用香港機場同基建，「所以我哋𠵱家最大優勢，仍然係我哋所有啲支柱產業，即係商業、物流、專業服務、旅遊等」。唔知全場梁粉畀鬍鬚曾一盆冷水兜頭淋，有乜感覺呢？
李八方
mailto:[email protected]