37歲的林嘉欣生完女，去年一復出即神勇無比，成為金馬大滿貫影后，出演老公袁劍偉執導的首部電影，又殺入金像獎爭女主角，「出番嚟拍戲，係興趣多過搵錢，因為搵錢係搵唔到嘅」。出道有幸得名導紅星加持，林嘉欣女演員人生的第二回合，享受拍片卻又刻薄自己，至於囡囡眼中媽咪做乜，「我話，我一時係貓，一時係巫婆，即係，扮鬼扮馬囉！」
撰文：林妙萍
攝影：郭賢興
錄影：林德雄
造型：顏英儀
髮型：Hin Wan
化妝：Vinci Tsang
珠寶：Piaget
林嘉欣的女演員之路，曾經中斷過，去了加拿大結婚、生女，平靜慢條斯理地過了幾年，去年回歸拍電影，神勇又神奇連環得獎、封后。
金像影后 機會一般
第一座金馬獎影后獎座，林嘉欣透露送了給《百日告別》導演，「冇小朋友之前，永遠只睇自己，𠵱家出番嚟拍戲，係興趣多過搵錢，因為搵錢係搵唔到嘅，哈哈。」
下月金像獎，和老戲骨張艾嘉、湯唯、新人王春夏爭影后。她坦言覺得自己拎獎的機會一般，「對自己唔夠滿意，初剪時，我直情同導演講，導演，我好似幫唔到你手。」得失平常心，「大家有份入圍已經係一個肯定，千祈唔好將自己嘅快樂同獎項掛鈎，否則會越活越唔快樂。」如果得獎，會用哪一幅藝術作品形容心情？「我會用一幅空白嘅畫去形容，唔可以因為得獎而stop咗自己嘅好奇心。」
向來密實的林嘉欣，去年金馬一套性感中空晚裝，人人嚇一跳。今次戰衣如何？「未呀，你知我唔係model身形，試衫嘅次數比人多一倍。」她多次得獎都着黑裙，「Lucky black？哈哈，黑色係心虛箒，無信心着其他色！今年唔會露咁多，上年金馬獎着上身唔覺好露，但影出來，嘩，原來都好多嘢睇，加上今年導演（老公袁劍偉）會同我一齊，我驚佢叫我披佢件西裝褸！」
阿媽工作 扮鬼扮馬
林嘉欣和袁劍偉生了兩個女兒，升格媽咪之後，令她人生體驗及思考方式都大大改變。「佢哋問我做乜，我有話我係演員；咁演員係乜？我話，我一時係貓，喵～；一時係巫婆，我會扮嘢囉，咁佢問，即係乜？我話，即係扮鬼扮馬囉，其實我哋份工，咪就係扮鬼扮馬囉。」
她和張學友的新片《暗色天堂》，學友扮牧師，她扮女職員，一場吻戲引發道德與法律爭議，議題敏感，更是老公第一次執導。林嘉欣直認拍片壓力非常大，既想做好演員一職，又想兼顧計成本，「因為佢係我身邊親密partner之餘，佢亦係今次導演，我又係佢演員，我好落力，好想畀佢驚喜。」像家人般的大哥哥學友，事隔十四年再合作，不時在身邊扶一把，「十四年前我係一個新人，太緊張，只顧到自己。今次係可以享受做戲，有一幕在車廂內錫完嘅一場戲，就係我哋即興演出嘅。」一場由四日cut到兩日，逼到她要叫停唞唞，服飾、道具的細膩，亦令她更易入戲。
聽一首歌 轉換心情
她坦言對自己要求高兼刻薄，因為出道時太幸運，有責任不負上天機會，但現時，啟發演戲享受，來自一對女兒，「我有時睇佢哋玩，會諗，其實做戲就應該係咁，咁有喜悅；以前演難過嘅戲，會不斷咁逼自己、逼自己，逼自己埋牆角，其實，唔需要咁用力，觀眾睇90分鐘都好攰㗎。」
常懷感恩與喜悅，鬧情緒時，林嘉欣推介去聽一首歌，轉換心情，「近期常常聽齊秦的《不要告別》，三木填詞，好適合夜晚聽，好舒服。」
睇好影后強敵
同學友再拍檔
莫奈與德加
林嘉欣一到《蘋果》大樓就問那一幅畫是新掛上去。曾經留學法國半年、愛藝術的她，連續三年成為法國五月節大使，一講到巴黎與五月節節目，她即停不到口，更提議愛好者多個不能錯過的節目，包括：有坐輪椅演員演出馬戲團的Disabled Theater、印象派大師莫奈及法國雕塑家埃德加·德加作品展，「莫奈今次有19、20幅珍貴畫作；而德加的生平作品，有近半、超過70個雕像響澳門展出，真係好精采。」
更多精采時尚內容，盡在 http://add.appledaily.com 。