蘋果公司完美示範了咩嘢叫「換湯不換藥」，新iPhone SE，唯一新意係個型號名唔係用數字之外，基本上係零睇頭。簡單嚟形容，就係iPhone 5個樣，但係有iPhone 6s個餡。對你同我來講，換機意欲好低。不過，隨着內地經濟放慢，就算送禮都唔可以送貴機，新款iPhone SE性能又高，價錢又平咗，正正乎合內地國情。相信係蘋果喺諗到新橋之前嘅緩兵之計。
講完iPhone，就真係推下一隻手機股，今日講酷派（2369），呢隻股票勝在冇晒壞消息，得好消息！講開壞消息，酷派1月公布「20供3」，供股價1.1元。本月初已完成供股，獲71.9%認購，剩下就包銷商食埋，貨源歸邊。第二，之前酷派同奇虎360嘅商業糾紛亦已傾掂數，不明朗因素又KO一個。
該公司上年6月公佈樂視入股酷派成第二大股東，後盾強勁！近期酷派於低位徘徊，如業績公佈係差都反映晒，反之績佳就有bonus。股價呢兩日見反彈勢頭，近期舜宇光學（2382）升得咁靚，手機股當旺，加上「港A股」有返生味，現價值博率高！
Fifi
http://www.facebook.com/lovefrystock
本欄逢周四刊出