出街打卡，又多一個好去處喇！日本海外第一間「Calbee Plus」概念店，噚日喺灣仔利東街開幕，主打即炸薯片薯條。
熱辣鬆脆冇油膉味
八方揀咗幾款嚟試，又喺超市買咗包普通版比較下，發現即炸嘅薯片「靚仔」好多，望上去白白淨，咬落都幾鬆脆；相比之下包裝版啲薯片好碎喎，炸到好硬之餘仲有陣油膉味，但兩者價格差成6倍，食邊款就你諗你喇！八方都有試食即炸芝士味薯條㗎，熱辣辣又外脆內軟，比薯片更加好食，都幾值得試。
概念店仲推出港……獨有避風塘香辣味薯片，炸好之後加避風塘辣粉，辣得幾過癮。四洲集團傳訊部總監劉碧琪同八方講，揀避風塘辣味代表香港，因為香港以前係個漁港，加上好多遊客都識避風塘，希望呢個味道，可以帶畀客人昔日情懷。
概念店噚晚6點正式開幕，狂風雷暴下，幾百人排隊試新嘢，人龍由利東街店舖對開伸延至廈門街，足足有成200米長。
李八方
mailto:[email protected]