藥箱原來唔可以變成首飾箱㗎！講緊係由米雪擔任代言人嘅御藥堂（932），呢隻股舊年底先至由創業板轉去主板掛牌，點知轉咗冇耐，噚日就發盈警，預告截至今年3月底止全年業績，營業額同純利都會大幅減少，原因又關本港零售市道疲弱嘅事。
難怪超人李嘉誠都話，今年本港經濟係廿年來最差，賣金、賣衫、賣袋，𠵱家甚至乎係賣藥都話生意唔好，真令人頭痕。經濟唔好，荷包唔夠腫脹，大家可以食少啲好嘢，買少件靚衫，估唔到連保健產品都慳得就慳，可能內地自由行減少都有些少影響。
御藥堂上年收益2.3億元，升34%，主要因為保健產品銷售額增加，產品範圍多咗，推廣活動又有幫助，一年過去，竟然要發盈警。睇嚟即使成日聽到米雪賣廣告話「藥箱都可以變首飾箱」都係幫唔到銷情。