因為太血腥喺內地攞唔到批文嘅《踏血尋梅》，估唔到噚日可以喺北京舉行嘅「2015年度華語十佳影片暨第七屆中國電影金掃帚獎頒獎禮」入面，獲選為華語十佳影片之一，男女主角郭富城同春夏憑《踏》片奪得年度男演員同年度新演員獎。親自去北京領獎嘅城城話：「任何獎項對我來說都是鼓舞，今次大會分別在中港台不同的影片作評選，而《踏血尋梅》未在內地上映，但大家給予十分高度評價，對劇組是十分鼓舞。」
王小帥憑《闖入者》奪得年度導演，年度男女配角分別係《解救吾先生》嘅王千源同《師父》嘅蔣雯麗。而獲選為十佳影片仲有《山河故人》、《一個勺子》、《醉生夢死》、《刺客聶隱娘》《我是路人甲》、《師父》、《百日告別》、《家在水草豐茂的地方》同《闖入者》。
楊冪三登金掃帚
至於金掃帚獎最令人失望男、女演員，分別由《惡棍天使》嘅鄧超同主演《小時代4：靈魂盡頭》、《何以笙蕭默》嘅楊冪奪得，楊冪已經係第3次被頒金掃帚影后，好多網友都批評佢為錢接戲接得太濫。而毒蘋果最令人失望電影獎就由《小》片包攬，最令人失望導演係《梔子花開》嘅何炅、《從天兒降》嘅魏楠同時奪得，最令人失望影片由呢兩部片兼得外，鄧超嘅《惡》片都有份。
撰文：馮仁昭