西班牙報紙《El Pais》日前爆料，話摩連奴經已同曼聯簽咗加盟協議書，仲話如果紅魔最終反口，最多要賠1,500萬鎊（約1.7億港元）畀摩佬。
雙方已簽加盟協議
先排有傳媒指，摩佬已同曼聯簽約三年，仲會喺今夏上任。《El Pais》上周六就獨家披露，指喺上年12月俾車路士炒魷嘅53歲葡萄牙名帥摩連奴，早前同曼聯簽咗加盟協議書，將會喺下季正式入主奧脫福，接替備受批評嘅荷蘭教頭雲高爾統領紅魔。
消息指，曼聯保留最終話事權，可以唔要摩佬，但就要賠筆錢，當係毀約金。據了解，若然紅魔喺5月1號都畀唔到一份最後合約摩佬，就要向對方賠500萬鎊；如果去到6月1日都仲畀唔到，就會再賠多1,000萬鎊。雖則曼聯高層對搵摩佬嚟教有分歧，但若果摩佬真係簽咗份對佢咁有保障嘅協議書，斷估紅魔都唔想將啲錢掟落鹹水海，無啦啦賠一大筆錢啩。
另外，有指雲高爾死唔斷氣，埋怨紅魔由上至下都冇人幫到佢，所以佢哋應該好似其他大會咁，增設一個足球總監嚟幫輕吓領隊。