政務司司長林鄭月娥噚日到葵芳出席香港社區網絡舉辦嘅「新春千人欣賞香港盆菜宴」（圖），同現場過千人食盆菜。盆菜咁多餸，林鄭第一件夾嘅係魚蛋。既然佢都鍾意食魚蛋，好應該畀小販喺新春期間喺街邊擺賣，咁咪唔會搞到「暴動」囉！
坐喺林鄭隔籬嘅恒基副主席李家傑亦好識做，夾咗件冬菇畀林鄭。林鄭致辭時話，盆菜有好多肉類，但大會為咗照顧現場嘅少數族裔，特製「清真盆菜」，以示文化共融！而呢次盆菜宴喺葵芳一個硬地足球場舉行，同場有社企喺度擺攤位，美容社企「悅己坊」向林鄭推銷時，叫佢可以嚟試吓，林鄭則笑笑口話自己「冇時間喎」！