上星期五港股成交增至928億元，接近兩個月以來最多，資金瘋搶濠賭、科網股，氣氛越嚟越強，其中近期有入市、有斬獲嘅朋友，信心返晒嚟，有渣拿唔怕同你再衝；至於冇追貨嘅朋友，亦開始有唔買就笨嘅心情。呢一刻，淡友、好友都將購買力消耗到極致，反彈浪尾水徵兆就出晒嚟。
當然，以一日半日計，呢種情況反而最易搵食，心態上當標尾會，短線博一兩棍，即分勝負，都冇壞；掉番轉，長揸，就認真無謂。
中港證券股近期走勢確係唔錯，但國泰君安（1788）升到飽飽滯滯，掉番轉大落後兼成交開始增加嘅耀才（1428）同英皇證券（717），係標尾彩嘅好選擇，兩隻股同樣係近期穩守保歷加通道中軸，技術走勢重覆上周五科網股爆發前嘅前兆；再講，強勢股近期日日新鮮，爆升股唔興連升，今日升完，資金聽日就會換馬，與其去追上星期五爆上一大棍嘅股份，不如捉未炒上又準備起動嘅新面孔，勝算最大。
上星期講過，H股指數進一步逼近9,000點嘅重大蟹貨阻力區，目前有機會輕微升穿呢個位，然後反彈浪收工。睇埋美股，標普500指數升到2,000點至2,100點，亦係密集阻力區，MACD形態上同10月反彈浪極為相似，併圖去睇，標普500指數亦快將見頂，因此，中線睇淡嘅立場冇變。
晉佳
https://www.facebook.com/advanceguy1/