曼聯嘅英格蘭前鋒朗尼衰過偷情就街知巷聞，勢估唔到佢竟然都有偷嘢癮；英國倫敦溫布萊球場嘅CCTV，就疑似流出朗尼2014年五月喺VIP房入邊偷「一剔」紀念品同波鞋嘅片段，本身贊助英格蘭同朗尼嘅一剔，同埋朗尼發言人就極力否認朗尼偷嘢，唔知呢次會唔會引發新一輪公關災難呢？
擸一剔紀念品
點解呢單差不多兩年前嘅疑似盜竊事件最近先浮面？原本溫布萊球場早幾年成日都有失竊事件，佢哋就加裝CCTV尋賊，2014年五月中就發現一名叫Mariusz Mozgiel嘅保安偷嘢，包括偷西裝同遊戲機等，結果上年就被定罪四個月監禁，事件本來都應該平息，不過英國《鏡報》嘅記者就認真眼利，喺CCTV搵到新發現，就係堂堂30萬鎊（約336萬港元）周薪嘅英格蘭隊長偷嘢。
英國《鏡報》周日就上載一段出自溫布萊VIP房喺2014年5月31日晚嘅視頻，疑似朗尼就同幾位朋友房內吹水，之後朗尼就有所行動，去擺滿一剔紀念品嘅組合櫃搜索，連波鞋都唔放過，朗尼一度想將波鞋放入後褲袋，但之後覺得唔夠大，就決定倒出裝滿垃圾嘅膠袋，將收穫放晒去膠袋，最後同老友好滿足咁離開。
朗尼︰已交律師處理
最衰朗尼想用不在場證據做藉口都唔得，30號英格蘭由佢壓陣下，喺溫布萊大勝秘魯3:0，第二晚佢同唔少國腳就應一剔邀請，再到溫布萊欣賞拳賽。好彩當日朗尼冇斷正，事關英格蘭大軍六月一號就出發去美國，準備巴西世界盃，如果俾警方調查，出唔出到境都成問題。
不過時至今日，《鏡報》問番一剔同英足總，佢哋都極力否認，一剔話當晚冇唔見嘢，朗尼發言人就話段片係假。朗尼亦喺fb話已交由律師處理，暫時唔方便回應。
表面睇，朗尼屬一剔當家贊助球星之一，要乜產品就有乜產品，理論上唔使偷，不過又可能朗尼本身係貪小便宜之輩，有得拎就拎，《鏡報》就問番唔少球迷，大概都係話朗尼係堂堂隊長，呢種行為真係好令人失望。