新世界發展（017）第二度提出私有化新世界中國（917），呢單刁成功與否，今日收市後就會有眉目，事關今日係新中小股東表態嘅最後限期，不少於九成小股東遞表同意，私有化先至成功。
其實新世界主席鄭家純（純官）都算重視新中，除咗加價私有化新中，今年初亦重金禮聘新鴻基地產（016）老臣子蘇仲強過檔，似係想大力發展新中業務。
蘇仲強喺新地做咗35年，前年走咗去內房股合景泰富（1813），佢離開新地前一直負責南中國業務，純官可能睇中佢喺內地人脈與經驗就挖角。
蘇仲強今年初已經返工，不過保持低調。華華早前遇到新世界發展聯席總經理陳觀展，佢指，蘇仲強喺新中負責實務，唔係顧問性質咁簡單，希望新中私有化單刁通過後，有機會再介紹蘇仲強嘅工作。