法國老將巫斯義，這幾天遇到記者時，都不約而同講同一番說話：「我現在最需要嘅係運氣，最想就係轉運！」
冇法啦，今季經常犯規嘅巫巫，本月6號一日之內，先後策「心思熟慮」及「華美之友」兩度犯規，其中「華美之友」直路向內斜跑，搞到史卓豐墮馬，跑埋下月3號賽事，又要停賽7期。5月1日復出之日，亦係佢同文家良主帥合約約滿之日，由於巫巫停賽多過跑馬，續約機會真係不容樂觀。
呢位大賽騎師暫時有得跑，就一定全力以赴，佢梗係想憑綠魔「有得威」捧走打吡一洗頹風，而同日第三場四班草地1200米隻「好叻仔」都有機會，呢匹三歲馬上仗喺羅理雅胯下獲季軍只輸頸位，頭馬「迫擊炮」同亞軍「好人好事」上次日賽再碰頭同樣包Ｑ；而殿軍「春意溢然」再出亦獲亞軍，證明水準高。
「好叻仔」今仗原本續由羅理雅策騎，不過佢因停賽，帥權因此落喺巫斯義身上，巫巫忽然冷手執個熱煎堆，剛周四佢喺草地考驗「好叻仔」後，大讚隻馬雖只得三歲，但情緒好集中，騎落好肯走，狀態Fit爆，話明今次對手再無「迫擊炮」、「好人好事」，不排除大勝一仗喎！