香港百米飛人徐志豪榮升老闆！26歲嘅佢今年喜事多籮籮，一月向未婚妻阿靚求婚成功後，再投資六位數字與拍檔開物理治療診所Elite Physio。徐老闆坦言開舖係為將來鋪路，會更專心為里約奧運衝喎。
徐老闆新店有三個老細，由構思到搵舖位到開店，三個月搞掂；大家夾咗100萬，徐老闆多人識，治療師阿Jay喺體院做咗13年物理治療師，曾經係李麗珊嘅隨隊治療師，佢話透過專業治療配合即場提供嘅康復訓練，患者可以盡快復元。
噚日喺灣仔運動場舉行嘅香港田徑系列賽第二回合，徐老闆喺男子100米跑決賽，以10秒40取得冠軍，係今年三次決賽最好一次。星期三將會到福州集訓嘅佢，期望挑戰里約奧運百米跑嘅10秒16標準。噚日另一亮點係港大跳高女將楊文蔚，以1.81米打破馮惠儀保持五年嘅1.80米舊港績。
蘇炳添60米跑平亞洲紀錄
另一方面，中國飛人蘇炳添上周五喺波特蘭室內田徑世錦賽，喺準決賽跑出6秒50嘅全國紀錄，時間仲平咗卡塔爾選手奧古諾德嘅亞洲紀錄，可惜佢喺決賽只造出6秒54，僅得第五，同胞謝震業快0.01秒得第四，冠軍由美國布洛梅爾跑出6秒47。