今日係打吡大賽日期，全港4歲精英馬爭奪殊榮，總獎金高達一千六百萬元，係2015/16年度馬季嘅一個高潮。記得去年打吡，朋友霍廣行（Terry Fok，壹傳媒獨立非執董）嘅「戰利品」力壓群雄，得到冠軍，左丁山戥Terry高興埋一份。
今日又係中大MBA校友簡文樂包廳請客之期，阿Paul自從1996年憑名下之「先見之明」由靳能策騎取得打吡冠軍後，對打吡賽一直興致勃勃，有打吡賽就有佢請客，今日中午仍在沙田馬會會所六樓宴請各國駐香港領事及友好，共同見證賽馬盛事。講開又講，香港賽馬聞名國際，不少外交使節限於種種原因（譬如唔係馬會會員）未必有機會親自入馬場觀光，阿Paul盡量邀請佢地睇打吡，算係為特區搞民間外交，推廣香港。現在每逢星期三賽馬夜，快活谷馬場往往逼到爆，餐廳滿到瀉，原因之一就係有好多商界應酬，招待外賓，招呼外來遊客等等活動舉行，與會展嘅商品展覽會相輔相成（參展完，晚上到馬場見識，係一個好節目），故此賽馬並非投注咁簡單，增加快活谷夜馬賽事直情有助香港旅遊業、展覽業及為商界爭取訂單。
講番今日打吡跑二千米，表面上以評分最高嘅1號「首飾太陽」，2號「明月千里」最着數，但「首飾太陽」雖然配上世界冠軍騎師莫雅，以及今季七戰六勝，但始終最長只係跑過千八米，跑二千米有小小疑問，2號「明月千里」在外地有二千二至二千五米賽績，又曾攞過3歲打吡賽（昆士蘭及南澳）亞軍，有力反先「首飾太陽」，外國博彩商睇好4號「威利加道」（葉森打吡第四名），所以牌面上係1號2號、4號控制大局，但第四隻實力馬3號「有得威」前兩次跑千六與千八，都只係輸俾1號及2號跑第三，亦有力加入戰團，買三重彩四重彩就以此四隻馬為重心，如果係臨場太熱，有一隻8號「代代為王」，可以考慮吓，此馬由大陸富豪潘蘇通擁有，馬主潘以出手闊綽著名，買親都係貴到飛起嘅馬，來港後尚無表現，操練則做齊功夫，試千六閘得第一，可惜蘇銘倫在杜拜罰停賽不能來港執韁，今次配上年青爛打騎師史卓豐，確係差一皮嘅，但殺入第三四名仍然有資格。贏打吡要講運，純粹講實力就簡單得滯咯，大馬主莊友堅養馬無數，啲威利乜乜、威利物物全部好似未贏過威水大賽，今日就好有機會憑隻「威利加道」大顯威風。