王浩信上月21日為拍無綫劇集《致命復活》一場車上爭執打鬥戲不慎受傷入院，佢出院留家休息幾日，近日為趕戲頂硬上復工，由於拍嘅係受傷戲，都唔使點化妝，實行戲假傷真。噚日下晝5點幾，馮仁昭發現王浩信一支公出現跑馬地養和醫院辦理入院手續，據知佢因為受傷未好再入院照磁力共振做徹底檢查。
有指出事當日劇組超時拍攝，為慳4,000蚊替身OT錢，導演叫王浩信親身上陣才發生意外，佢事後淡化事件只稱輕微腦震盪同手指縫針。
落樓梯企唔穩
噚日王浩信戴住頭箍同黑色口罩、孭背囊現身養和，一臉憔悴，佢左額受傷位置腫到乒乓波大，左眼眼窩有瘀痕，當護士陪佢落樓梯去搭𨋢時，王浩信仲出現步履不穩，精神狀況好差。
馮仁昭噚日短訊問候王浩信，佢回覆：「左額仲未消腫，左眼睇嘢有啲矇，所以入院check下，多謝關心。」老婆陳自瑤因為開工未有陪伴，據知王浩信今日出院又要為即將推出新劇《EU超時任務》拍宣傳片。王浩信噚晚入院後貼微博，其中一張相係前晚拍醫院戲造型，佢留言：「頭上有血是昨晚的醫院戲，今天又來到真正的醫院做檢查，我和我的角色Max開始分不清。」
撰文：馮仁昭