立法會秘書長陳維安呢排應該幾忙，皆因有位新丁議員要照顧，但八方相信難佢唔到，皆因佢兒時已經係多嘴仔，新丁議員有乜唔明，秘書長肯定滔滔不絕詳盡解釋。
陳維安話細個都算乖仔，但就口水多，試過俾幼稚園老師喺成績表評佢「多嘢講」，在家「都係多嘴過細我兩歲嘅妹妹。」呢位拔萃仔由於鍾意講嘢，中學理所當然加入辯論隊，記得中六時做prefect，「成日都捉人遲到，捉啲低年級同學（午飯）要食晒啲蔬果紅蘿蔔。」
佢話中學時冇乜去舞會，有次名校女生都參加嘅辯論隊慶功宴，佢都no show，「諗番轉頭，真係好儍，哈哈。」中六時由於已知有美國大學收佢，所以赴美前索性大解放：「最後嗰次嘅考試係有少少hea㗎。」而大學最大收穫肯定係識咗低一班嘅同學、現為老婆嘅陳太，佢哋拍拖七年後喺1993年結婚！