聽日起程到馬來西亞出戰乒乓球團體世錦賽嘅港隊，噚日喺體院見傳媒，上屆得17名嘅港男，隊員之一嘅江天一因膝傷冇入選，18歲小將何鈞傑或會升做第三單打。港男缺少主力，同組仲有勁旅南韓、俄羅斯，教練陳江華認為現時世界排12位嘅香港一哥黃鎮廷仲後生，喺大賽嘅表現仍然唔夠穩陣，今屆出線八強都收貨。至於女團就由近期回勇嘅帖雅娜領軍，希望保住上屆第三嘅佳績喎！