現年33歲的千億新抱徐子淇昨在上環出席慈善活動，她過去8年為丈夫李家誠先後誕下兩女兩子，湊成兩個「好」字，老爺「四叔」李兆基非常滿意，子淇自爆去年剖腹生完孻仔建熹後，曾在囝囝的百日宴上宣佈封肚，子淇昨日透露醫生指她可再生，不過她卻怕辛苦。
夏威夷度歲
子淇昨日以飄逸打扮出席活動，她表示農曆新年與家人到了夏威夷旅行，並安排了孩子們跟海豚暢玩和戶外活動，她說：「細仔喺飛機瞓足全程，好似大昏迷，我有用手指睇探吓佢有冇唞氣，佢瞓覺我哋好舒服，佢可能知表現好，有得再去。」子淇指孩子相處很融洽，她說：「有時整喊咗細佬又走開，我湊得好開心，20幾歲同30幾歲生感覺好唔同，20幾歲生感覺多姿多采，30幾歲生覺得BB融咗喺我心，𠵱家唔想出街，日日想攬住佢。」
四叔嗌滿足
問到老公李家誠有呷醋嗎？子淇說：「有，以前我夜晚會陪老公睇書，𠵱家佢有問幾時輪到佢，我遞BB畀佢，佢話唔係，我都覺忽略咗老公。」子淇認同孻仔拉心肝，她說：「我真係好愛佢，可能BB好乖，一醒就對住我笑。」既然如此就不要封肚繼續生，子淇說：「生就唔難，教難，要花好多時間，好擔心。」她指去年生完孻仔，醫生完指她還可生下去，因為沒有「黏連」情況可以繼續生，子淇說：「生仲可以，不過太辛苦，要花好多心機。」她透露老爺都叫夠：「佢好滿足，咁多小朋友陪佢玩。」
子淇已計劃復活節再安排節目給子女，她自問非怪獸家長，平日都鼓勵孩子參加課外活動，她笑言二女試鏡演話劇，不介意做茄喱啡。
採訪：羅慧敏
攝影：陳順禎