律師會噚日同傳媒茶敍，席間會長熊運信分享之前隨律政司司長袁國強到柬埔寨交流嘅有趣經歷。話說佢哋以貪污同人權保障為題，向近300名當地律師發表演講，熊運信話喎，好記得演講完之後，在場第一條問題係問佢：「每個月要畀幾多錢法官？」熊運信答：「從來都冇。」當地律師聞言好驚訝咁問：「咁你咪輸晒你啲官司？」搞到熊運信除咗苦笑，都唔知畀乜反應。
當日都同場嘅律師會副會長蘇紹聰補充，話會長演講後，當地律師代表大讚講得好好，但指若有下次機會，人權保障方面「最好唔好講」，令佢覺得當地國情真係與別不同。講完外遊，對於近日成為國際焦點嘅李波事件，熊運信都話唔明點解內地至今未安排到港府同李波直接會面，認為港府應再盡力啲跟進喎。