自由黨噚日同傳媒新春團拜，三句唔埋當然又會講起年初一嘅旺角騷亂，近期唔少人將事件同六七暴動相提並論，該黨榮譽主席劉健儀（Miriam）自爆喺1967年都有份「搞事」……大家唔好誤會，佢唔係出街掟「菠蘿」。原來當時劉健儀喺港大學生會負責康樂，重點工作，原來係「促進男女關係和諧」，據知真係促成唔少戀情，原來係港大紅娘嚟㗎喎！
Miriam話新年去咗日本旅行，年初一晚一開手機，即刻收到百幾個短訊，全部都係關於呢件事，證明幾咁轟動。
照搞舞會嘉年華
談及騷動有港大學生參與，Miriam就話自己1967年讀港大時都有份「搞事」，佢只係話自己當年喺學生會專責康樂活動，雖則當年社會環境立立亂，但佢冇有怕，舞會、嘉年華一於照搞，皆因佢要促進校友嘅「男女關係」和諧。至於係搞手嘅佢呢，就「賣花之人插竹葉」喇！
講開男女關係，自由黨另一榮譽主席周梁淑怡都諗起件趣事，佢話當年飛哥李鵬飛俾人「扑頭」後，飛嫂方寸大亂下打畀佢，佢就幫忙報警啦，後來去到醫院，老公順便跟警車去飛哥屋企拎睡衣，點知俾傳媒誤會，以為佢先生要助查，事件越傳越誇張，搞到佢哭笑不得。
李八方
mailto:[email protected]