環境局局長黃錦星同大嘥鬼幾乎已經係政界最佳拍檔。噚日佢哋又孖咇出席「匡智賽馬會玻璃樽回收計劃」開幕禮，並參觀現場嘅展覽攤位，之不過大嘥鬼噚日縮咗水，唔係1︰1真人，只係布公仔。
雖則大嘥鬼已經係城中「知名人士」（八方懷疑市民認得大嘥鬼多過局長），但黃錦星依然向在場人士介紹佢呢位「吉祥物」好拍檔，仲「派」佢同馬會慈善及社區事務執行總監張亮合照留念（圖），提醒大家減少浪費。
其實馬會喺2010年已捐助匡智會推行以上計劃，6年內已成功回收約3,900噸玻璃樽製成嘅環保磚，並為逾250名智障學員提供訓練及回收玻璃樽嘅就業機會，未來會投放更多資源喺社區教育，宣揚「乾淨回收」玻璃樽。