雖然話環球經濟前景唔樂觀，但好多人仲認為我哋北面嘅中國係經濟強國，睇吓近呢兩個月幾近瘋狂嘅中超轉會，國內球壇似乎仲有使唔盡嘅財源。英超利物浦都唔執輸，據講最近同中國財團傾緊，將晏菲路球場主看台，為期10年嘅冠名權出售畀對方，獲利成9,000萬鎊（約10億港元），到時晏菲路嘅國內譯名安菲爾德球場，應該會喺球場隨處可見，仲要係簡體字喎。染紅後嘅利物浦，名副其實係「紅軍」咯。
中國企業爭住贊助
利物浦嘅商業事務總監比利賀根，早排親身飛咗去中國，同三家唔同公司傾生意，睇吓邊個最有誠意同佢哋合作。紅軍主場晏菲路即將會擴建到能夠容納54,000人，球會方面自然希望可以開拓吓新財源幫補吓支出。
雖然利物浦近年成績麻麻地，但佢哋淨係用喺收購球員嘅支出，就仍然係歐洲頂級豪門嘅級數，唔諗多啲計吸金真係唔掂。除咗賣看台冠名權之外，𠵱家贊助緊佢哋練習波衫、嚟自印尼嘅航空公司Garuda Airlines，都同紅軍傾緊續約；雙方目前嘅三年合作協議，利物浦每年都收到550萬鎊贊助費。好在持有紅軍嘅Fenway Sports Group，冇打算為錢直接將有超過一百年歷史、晏菲路球場呢個名改咗去，佢哋諗到其中一條主要財路，就係將球場主看台嘅冠名權出售，希望可以傾到一份為期10年，每年收番7至900萬鎊嘅看台贊助合約。
利物浦染紅，佢哋嘅棄將同前度主帥就被傳會去埋中超搵食。前鋒巴洛迪利喺今季被外借返去AC米蘭，球季未完教練米赫洛域就話唔想再用佢；巴神經常被批評喺場上係懶鬼一名，更加唔適合紅軍主帥高路普崇尚「跑跑跑」嘅戰術，清洗佢係勢在必行。據講有中國同埋土耳其球會都有興趣簽巴神，不過論財力肯定係中超球隊秤先。
巴神羅渣士或齊搵人仔
至於喺今季初被炒嘅羅渣士，同樣有中超球會想簽佢。北京國安最近落實簽沙哲朗尼之前，曾經斟過羅渣士，仲開出相當唔錯嘅條件，但離開利物浦收番唔少賠償金嘅羅渣士，仲想認真考慮吓先決定幾時復出球壇。