金鐘「Light Rose Garden玫瑰燈海」經過三天「遷徙」期，20日起正式遷移至添馬公園，至22日（星期一）晚上6時至11時會再次亮起，迎接中國情人節。料再有大批市民前往拍照，但其實現場燈光黯淡，想影靚相有一定難度。《蘋果》找來攝影師徐遠亮（Rex），傳授手機影靚花海技巧，拍出精彩「呃Like」相。
記者：佘錦洪
作為專業攝影師，Rex屢為雜誌主理封面及為外國品牌負責時裝硬照，今次Light Rose Garden的宣傳照亦是由他操刀。講到影花海，用慣「大機」的他稱需要用三腳架提高相機穩定性以使用慢快門拍攝，想拍攝人像更要用閃光燈補燈。
不過，不少情侶會選擇在放工或逛街後到場，往往都輕裝上陣用手機拍攝，亦方便放上網與朋友分享順便「呃Like」。Rex稱手機在鏡頭焦距有限制，未能如相機廣角鏡般拍出壯麗場面，但可用構圖搭救，「盡量用橫度（打橫的構圖）去影，高過啲花少少，前面揀一兩朵做主體，三分二都係花海，咁就做到無窮無盡嘅感覺」。
若想將夜景都拍下來，Rex稱可考慮維港景或是高樓大廈的燈光，盡量避免拍到紅色的賀年燈飾，「因為紅色會好搶，一望就望到，同白色花海唔夾」。因手機比較靈活，他稱可將手機放低，以低角度拍攝，令近鏡頭的花如鶴立雞群般突出。
花海現場欠缺燈光，Rex指如要拍攝人像，不妨考慮拍「剪影」。他指只需側身靠近花海，利用LED花照出輪廓曲線再拍攝即可，「咁樣又唔洗諗點補燈，放上網都應該呃到唔少Like」，如是情侶亦可以面對面站，「個剪影會好浪漫」。
若要「見樣」，Rex稱切忌使用拍攝手機的機背閃光燈，「影出嚟會好硬，好似Key落去咁唔好睇」。理想的打燈方法是使用另一部手機，以手電筒或推光螢幕為人臉補光，其中後者效果更佳，「就咁LED燈會偏藍，但用螢幕嘅可以搵啲暖啲嘅顏色嘅圖，好似粉紅色咁，影出嚟就好睇啲」。補光的角度亦有講究，「最好由下面打上去，模擬返係花海射上嚟嘅光」。
Rex表示，因光線不足手機要推高感光度（ISO）拍攝，往往訊噪（Noise）亦較高，因此曝光宜暗不宜黑，「太白太光會好多Noise，寧願影黑啲再加少少曝光」。他又指可善用不同App為相片添加Filter效果，「呢啲你哋一定熟啲」。
技巧重點
1.用橫度影，相片三分二為花海
2.避免拍到紅色賀年燈飾，因與白色花海不配襯
3.低角度拍攝，令近鏡頭的花較突出
4.現場欠缺燈光，拍攝人像考慮拍「剪影」
5.拍攝人面，勿用手機機背閃光燈
6.用另一手機的電筒或推光螢幕為人面由下向上補光
「Light Rose Garden玫瑰燈海」
日期：2月20日（星期六）至22日（星期一）
亮燈時間：晚上6時至11時